Ny teny vahiny nogasiana

 

Marihana fa tsy fitsipika azo ampiharina avy hatrany ireto fa fisedrana fotsiny ihany eo amin’ny sehatry ny fandrindrana ny fomba fanoratra ireo teny vahiny nogasiana.

1 - Ny « in- » amin’ny teny vahiny raha manomboka ny teny dia tanana ihany saingy gasiana ny fomba famaky azy:
ohatra:
indostria « industrie » ;
indonezia « Indonésie ».
- Ny « -in- » amin’ny teny teny vahiny raha eo anivon’ny teny ny toerana misy azy dia ahitana endrika roa toy izao ary gasiana ny fomba famaky azy:
a) « -en- »
ohatra:
sendika « syndicat » ;
b) « -in- »
ohatra:
printsy « prince ».

2 - Ny anarana olom-pirenena na anarana iombonana miafara amin’ny « -ain,ne » na « -en,nne » amin’ny teny vahiny ny tandrifin’io farateny io dia « -ana » « -anina » amin’ny teny malagasy.
ohatra:
Afrikana / Afrikanina « Africain »- « Africaine » ;
Amerikana / Amerikanina « Américain »- « Américaine » ;
Indoneziana / Indonezianina « Indonésien »- « Indonésienne » ;
Indiana / Indianina « Indien »- »Indienne ».

3 - Ny mpamari-toetra miafara amin’ny « -ain,ne » na « -en,nne », amin’ny teny vahiny ny tandrifin’izany farateny izany dia « -ana » na « -anina » amin’ny teny malagasy.
ohatra:
finoana kristiana / krisitianina « foi chrétienne » ;
Filoham-panjakana amerikana / amerikanina « Chef d’Etat américain ».

4 - Ny anaran-javatra miafara amin’ny « -ne » amin’ny teny vahiny, ny tandrifin’izany dia « -nina » amin’ny teny malagasy.
ohatra:
telefaonina « téléphone » ;
lafarinina « farine » ;
ozinina « usine ».

5 - Ny anarana miafara amin’ny « -tre » amin’ny teny vahiny dia: na « -tatra »
ohatra:
metatra « mètre » ;
litatra « litre ».
na « -tra »
ohatra: rezisitra « registre » ;
pretra « prêtre » ;
polipitra « pupitre ».
na « -ra »
ohatra:
litera  » lettre ».
no tandrifin’izany amin’ny teny malagasy.

6 - Ny teny miafara amin’ny « -ment » amin’ny teny vahiny dia toy izao manaraka izao no tandrifin’izany araka ny ampiasan’ny mpiteny azy ary dia tanana ihany aloha sady gasiana ny fomba famaky azy:
na « -manta »
ohatra:
governemanta « gouvernement ».
Maningana ohatra:
simenitra « ciment » izay »-nitra » no tandrify miasa.

7 - Ny -ent mamarana ao amin’ny teny vahiny, ny tandrifin’izany amin’ny teny malagasy dia « -enta »
ohatra: talenta « talent ».

8 - Ny teny miafara amin’ny -eur amin’ny teny vahiny, ny tandrifiny amin’ny teny malagasy dia toy izao manaraka izao:
« era »
ohatra: faktera « facteur ».
« ora »
ohatra: profesora « professeur ».

9 - Ny feo [ô] teny vahiny tsy asiana satroka rehefa gasiana raha tsy enti-manavaka teny roa mitovy fanoratra fa tsy mitovy hevitra:
ohatra : moto sy môtô ;
motera, tsy asiana tendro satroka satria tsy misy teny mitovy fanoratra aminy.

10 - Ao amin’ny teny vahiny nogasiana dia angamba azo atao ny mampiasa renifeo roa mifanarakaraka mba hampikoriana kokoa ny fomba famaky ka ny tsy asiana zanapeo dia izay tsy ahitana izany ao amin’ilay teny nogasiana.
ohatra:
faktera fa tsy fakitera no ho tandrifin’ny « facteur » ;
administratera fa tsy adminisitratera ny ho tandrifin’ny « administrateur ».

11 - Ny teny vahiny miafara amin’ny: ie , dia « ia » no ho tandrifiny amin’ny teny malagasy.
ohatra: filozofia.

12 - Ny feo gn amin’ny teny vahiny dia ñ no ho tandrifiny amin’ny teny malagasy.
ohatra:
Espagne « España »

13 - Ny « -trie » mamarana amin’ny teny vahiny, ny tandrifiny dia tria ary tsy gasiana ny fomba famaky azy:
ohatra:
indostria; « industrie ».
- Ny tr- manomboka amin’ny teny vahiny dia tanana ary tsy gasiana ny fomba famaky azy,
ohatra:
tribonaly;  » tribunal ».
- Ny -tr- anivo dia tanana ary tsy gasiana ny fomba famaky azy.
ohatra:
astronomia; « astronomie ».
- Ny -tre mamarana raha tanana dia gasiana ny fomba famaky azy.
ohatra: metatra; « mètre ».
Maningana
ohatra:
teàtra « théâtre ».

14 - Ny « -ture » mamarana ny teny amin’ny teny vahiny dia »tiora » no tandrifiny amin’ny teny malagasy.
ohatra:
literatiora; littérature.

15 - Ny anaram-bolana sy ny andro dia narindra ho toy izao manaraka izao:
ohatra:
janoary, febroary, marsa, avrily, mey, jona, jolay, aogositra, septambra, oktobra, novambra, desambra ;
ohatra:
alatsinainy, talata, alarobia, alakamisy, zoma, sabotsy, alahady.

16 - Misy teny efa fampiasa iraisan’izao tontolo izao tafiditra ao amin’ny tontolo malagasy ary matetika izy ireny dia hita any amin’ny voka-pikarohana siantifika sy eo amin’ny serasera andavanandro ihany koa toy ny: bungalow, quartz, taxi, uranium, wagon, watt, ka heverinay fa mety angamba raha ampiana ireto tarehintsoratra manaraka ireto ny abidy malagasy: {c ; q ; u; x ; w}.

Antananarivo, 23 novambra 2000